RJ NEWS– हमर छत्तीसगढ़ म तो हिरवा ल सब झन जाड़ घानी निमगा कउल के बुलत बुलत खात रथें। त एक ठ तरीका आये ए ल अइसनेच भूंज के खाये वाला।
दाल
दूसर व्यंजन होए एखर दाल बना के खाना। जइसे आने दाल मन ल चुरोये जाथे ठीक वइसने हिरवा के दाल बना के भात चाहे रोटी के संग म खाये जाथे।
पूरी रोटी
पूरी रोटी
छत्तीसगढ़ म कुल्थी के सबले जादा अउ परसिध बने वाला पकवान होए चाउर आटा के पूरी रोटी।
पूरी रोटी कहे ले हमन ल गहूँ पिसान के पूड़ी के सुरता आवत होही फेर एहा आने होथे।
पूरी रोटी ल हमर राज म खासकर के छेरछेरा के तिहार घानी बनाए जाथे। ए रोटी ल बनाये के बिधि ल हमन आप मन सो साझा करत हन।
जिनिस
1 पाव चिक्कन चाउर पिसान
आधा किलो हिरवां
1 पाव गुर
तले बर रिफाइंड तेल
हिरवा पूरी रोटी बनाये के बिधि
सबले पहिली हिरवां ल कराही म कर के कम आंच म कउल लेना हे, ओखर बाद ओला थोकन जादा पानी म डार के बन्ने चुरो लेना हे।
जब ओहा ह चूर जाए त ओला हेर के अउ पानी ल निथार के गुर के संग म पीस लेना हे।
अब चिक्कन चाउर पिसान के घोल तियार कर लेना हे।
(धियान रहय की पिसान ल चिक्कन होना हे नही त रोटी ह बने नई बनही)
पिसाये गुर अउ दार के अब गोलवा गोलवा लाड़ू असन बना लेना हे।
एतके बेर कराही म तेल ल गरम होय बर छोड़ देहे रईहा। जब तेल ह बने गरम हो जाही तहाँ ले ओमा दाल के लाड़ू ल पिसान म बोर बोर के तेल म डालत जाना हे।
थोर अकन लाल सही होय ले अब रोटी ल छान लेना हे।
बन गे हमर पूरी रोटी।
त अईसे बनथे चाउर पिसान अउ हिरवा के पूरी रोटी। पूरी रोटी ल चना दाल, मूंग दाल चाहे झुनगा के भी बना सकत हें फेर बिधि ह ओइच रथे।
त आज हमन जानेन कुल्थी के बारे म, ओखर फायदा, परकार अउ छत्तीसगढ़ म एखर बने तीन परकार के व्यंजन।
छत्तीसगढ़ के बारे म अईसने जानकारी बर हमर सो बने रईहा।
